Die Irrlichter
Текст песни Nu Schriet Aber Diu Nebelkra

Diu welt was gelf, rot unde bla,
gruen in dem walde und anderswa:
kleine vogele sungen da.
nu schriet aber diu nebelkra.
pfligt si iht ander varwe? ja!
sist worden bleich und ubergra.
des rimpfet sich vil manic bra.

Ich saz uf eime gruenen le;
da ensprungen bluomen unde kle
zwischen mir und eime se:
der ougenweide ist da niht me.
da wir schapel brachen e,
da lit nu rife und ouch der sne.
daz tuot den vogellinen we.

Die toren sprechent snia sni,
die armen liute owe owi
des bin ich swaere alsam ein bli.
der wintersorge han ich dri.
swaz der unt der andern si,
der wurde ich alse schiere fri,
waer uns der sumer nahe bi.

E danne ich lange lebt also,
den krebz wolt ich e ezzen ro,
sumer, mache uns aber fro!
du zierest anger unde lo:
mit den bluomen spilt ich do,
min herze swebt in sunnen ho:
daz jaget der winter in ein stro.

Ich bin verlegen als Esau:
min sleht har ist mir worden ru.
suezer sumer, wa bist du?
ja saehe ich gerner veltgebu.
e deich lange in selher dru
beklemmet waere als ich bin nu,
ich wurde e munch ze Toberlu.